މިދިޔަ އަހަރުގެ އަހަރީ ރިޕޯޓުތައް ހުށަނާޅާ ދެ ޕާޓީއާމެދުވެސް ގާނޫނީ ފިޔަވަޅު އަޅާނެކަމަށް އިލެކްޝަން ކޮމިޝަން (އީސީ) އިން ބުނެފިއެވެ.

އީސީގެ ނައިބު ރައީސް އަބްދުއްރަހްމާން ސަލާހު ރަޝީދު ވިދާޅުވީ، ރާއްޖޭގައި ނުވަ ސިޔާސީ ޕާޓީއެއް ހިންގަމުން އަންނައިރު މިދިޔަ އަހަރުގެ އަހަރީ ރިޕޯޓު ހުށަހަޅާފައިވަނީ، ހަތް ޕާޓީއަކުން ކަމަށެވެ.

މިދިޔަ އަހަރުގެ އަހަރީ ރިޕޯޓު ހުށަހަޅާފައިވަނީ ސަރުކާރު ހިންގާ ޕާޓީ ޕީއެންސީއާއި އިދިކޮޅު މައި ޕާޓީ އެމްޑީޕީ، ޖުމްހޫރީ ޕާޓީ، އަދާލަތު ޕާޓީ، އެމްއެންޕީ އާއި، އެމްޑީއޭގެ އިތުރުން ދަ ޑިމޮކްރެޓްސްއިންނެވެ.

އީސީން ބުނި ގޮތުގައި އަހަރީ ރިޕޯޓު ހުށަނާޅަނީ ޕީއެންއެފްއާއި އެމްޓީޑީންނެވެ. 

ސިޔާސީ ޕާޓީތަކުގެ ގާނޫނުގެ ދަށުން ޕާޓީތަކުން ކޮންމެ އަހަރެއްގެވެސް އަހަރީ ރިޕޯޓް އިލެކްޝަންސް ކޮމިޝަނަށް ހުށަހަޅަން ޖެހެެެއެވެ. މިދިޔަ އަހަރު ރިޕޯޓުތައް ހުށަހަޅަން ހުޅުވާލި މުއްދަތު ހަމަވެފައިވަނީ މި މަހުގެ އެއްވަނަ ދުވަހުއެވެ. 

މީގެ އިތުރުން މިއީ އިލެކްޝަންސް ކޮމިޝަނުން އެ ކޮމިޝަނުގެ އަހަރީ ރިޕޯޓު އާންމުކޮށް ޕާޓީތަކުގެ ތަފްސީލު ހާމަކުރި ފުރަތަމަ ފަހަރެވެ. އެ ކޮމިޝަނުން ބުނެފައިވަނީ މި ތަފްސީލުތައް އާންމުކުރަން އެ ކޮމިޝަނުން ނިންމީ ޕާޓީތައް މޮނީޓާ ކުރުން ހަރުދަނާ ކުރުމުގެ މަސައްކަތުގެ ތެރެއިން ކަމަށެވެ.