އިދިކޮޅު އެމްޑީޕީން މިހާރު ބާއްވަމުންދާ ސިލްސިލާ މުޒާހަރާތަކުގައި ރައީސް ޑރ. މުހައްމަދު މުއިއްޒުގެ ދަރިކަލަކަށް ނިސްބަތްކޮށް ވާހަކަ ދެއްކި މައްސަލައިގައި އެމްޑީޕީގެ 
އިސް އެކްޓިވިސްޓެއް ކަމަށްވާ މަރިޔަމް ޒުބެއިރު (މަންދީ)ގެ އާއި އެ ޕާޓީގެ ޗެއާޕާސަން ފައްޔާޒް އިސްމާއީލުގެ އިތުރުން އެ ޕާޓީގެ މައްޗަށް ދައުވާކުރަން ނިންމައިފި އެވެ.

ރައީސްގެ އާއިލާގެ ފަރާތުން މ. ދިމްޔާތުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ މަނިކުފާނުގެ އާއިލާގެ ފަރާތުން ވަކީލު، ކުރީގެ ބަންޑާރަ ނައިބު އާޒިމް ޝަކޫރު
 ވަނީ މި މައްސަލާގައި ރައީސްގެ އަނބިކަނބަލުން ސާޖިދާ މުހައްމަދު ނެރުއްވަވާ ނޫސްބަޔާން އިއްވައިފަ އެވެ.

އެ ނޫސްބަޔާނުގައި ފަސްޓް ލޭޑީ ވިދާޅުވީ، އެ ކަމަނާގެ ދަރިކަލުން އުމައިރު މުހަންމަދު މުއިއްޒުއަށް ނިސްބަތްކޮށް، މިވޭތުވެދިޔަ އަހަރެއްހާ ދުވަހުގެތެރޭގައި، ހާއްސަކޮށް މިދިޔަ ދެތިން ދުވަހެއްގެ ތެރޭގައި ހަގީގަތެއް ނެތް ދޮގު ވާހަކަތައް ދައްކައި، މީޑިއާއާއި ސޯޝަލް މީޑިއާގެ އެކި ޕްލެޓްފޯމްތައް މެދުވެރިކޮށް ފަތުރާފައިވާ ކަމަށެވެ. އެގޮތުން ފަތުރާފައިވާ ވާހަކަތަކުގެ ތެރޭގައި އުމައިރަކީ ވޭޕް ބޭނުންކުރާ ކުއްޖެއް ކަމުގައިވާ ފަތުރާ ވާހަކަތަކަކީ ދޮގު ވާހަކަތަކެއް ކަމަށް ވިދާޅުވިއެވެ. 

މި ފުރުސަތުގައި އުމައިރަކީ ވޭޕް ނުވަތަ ދުންފަތުގެ އިސްތިއުމާލުވެސް އެއްވެސް ގޮތަކަށް ކުރާ ނޫނީ ކޮށްފައިވާ ކުއްޖެއްނޫންކަމުގައި، ތިޔަ އެންމެ ބޭފުޅުންގެ މައުލޫމާތަށްޓަކައި ވަރަށް ސާބިތުކަމާއެކު ދަންނަވަމެވެ. މިކަންކަން މިހެންކުރަމުންދަނީ އަޅުގަނޑުގެ ފިރިމީހާއާއި ސިޔާސީ ގޮތުން ހިޔާލުތަފާތު އެކި ފަރާތްތަކުން ކަމުގައި ފާހަގަކުރަމެވެ." ފަސްޓް ލޭޑީ ވިދާޅުވިއެވެ.

ނޫސްވެރިންގެ ބައްދަލުވުމުގައި އާޒިމާ ވިދާޅުވީ، ރައީސްގެ އެންމެ ތުއްޕުޅު ދަރިކަލުންގެ ފޮޓޯ އާއި ދަރިކަލުންގެ އިތުރު ފޮޓޯތައް އާންމުކޮށް އިދިކޮޅުން މަސައްކަތްކުރަނީ ހޭޓް ސްޕީޗު ފެތުރުމަށް ކަމަށާއި އެކަމަށް އަޅަން ޖެހޭ ފިޔަވަޅެއް އަޅާނެ ކަމަށެވެ.