ފާއިތުވި ދެ ދުވަސް ތެރޭ އެންމެ ގަދަޔަށް ދެކެވުނު ވާހަކަ އަކީ މިއީ އެވެ.

ރައީސް މުހައްމަދު މުއިއްޒުގެ ދަރިކަލަކަށް ނިސްބަތްކޮށް، އެކުއްޖާގެ ކަރާމާތް ނަގާލާ ގޮތަށް އެމްޑީޕީގެ މުޒާހަރާއެއްގެ ތެރޭގައި މަރިޔަމް ޒުބެއިރު (މަންދީ) ދެއްކި ވާހަކަ އެވެ.

އެ ވާހަކަ ސޯޝަލް މީޑިއާއިން ނުފިލައި އުޅެނިކޮށް މިއަދު މަންދީއަށް ދައުވާ ކުރާނެ ކަމަށް ރައީސްގެ އަނބިކަނބަލުން ސާޖިދާ މުހައްމަދުގެ ފަރާތްޕުޅުން  ބަޔާނެއް ނެރުއްވައިފަ އެވެ.

ބަޔާން އިއްވެވީ ވެސް ނޫސްވެރިންގެ ބައްދަލުވުމެއް ބާއްވައިގެން، ވަކީލު އައިޝަތު އާޒިމާ ޝަކޫރެވެ. 

މިއާ އެކީ މިއަދު ވެސް ސޯޝަލް މީޑިއާގައި ސިޔާސީ މަސްރަހުގެ މައުޟޫއަކަށް އޮތީ މި ކަމެވެ.

މީގެ ކުރިން ވެސް އެކި ރައީސުންނާއި އެބޭފުޅުންގެ އާއިލާތަކަށް އެތަކެއް ދޮގު ދެރަ ތުހުމަތުތަކެއް ކުރެ އެވެ. އިދިކޮޅުގައި އޮންނަ ބަޔަކު އެ ވާހަކަ ދެއްކި ނަމަވެސް، މިއީ މި ފަހުގެ ތާރީހެއްގައި މިފަދަ ކަމަކާ މެދު ދައުވާކުރަން ރައީސެއްގެ އާއިލާއަކުން ނިންމި ފުރަތަމަ ފަހަރެވެ.

ސާޖިދާ ވިދާޅުވީ، މިކަން ކުރުމަށް ނިންމެވީ މަންމައެއްގެ ހައިސިއްޔަތުން ދަރިން ހިމާޔަތްކުރުމަށް ކަމަށެވެ.

އަދި މިއީ މުސްތަގުބަލުގައި މިފަދަ މަގާމުތަކުގައި ތިއްބަވާ ބޭފުޅުންގެ އާއިލާތަކަށް ރައްކާތެރިކަން ހޯދައިދިނުމަށްޓަކާ ވެސް މުހިންމު ފިޔަވަޅެއްކަމުގައި އެކަމަނާ ފާހަގަަކުރެއްވި އެވެ.

-------

ނައިބު ރައީސް ހުސައިން މުހައްމަދު ލަތީފް ލިޔުއްވި އެވެ؛ ޒާތީވުމަކީ މުޖުތަމަޢުގެ އެއްބައިވަންތަކަން ނަގާލާ، އިޖުތިމާއީ ފޭރާން ފަސާދަކުރާނެ ކަމެކެވެ.

ސިޔާސީ ޕާޓީތަކުގެ ހަރަކާތްތައް ވެސް ވާން ޖެހޭނީ ޕްރޮފެޝަނަލް، އަދި ރައްޔިތުންނަށް ނަމޫނާ ހަރަކާތްތަކަކެވެ. އެންމެން ގުޅިގެން މަސައްކަތް ކުރަންވާނީ މުޖުތަމައުގެ ގަދަރާއި ކަރާމާތް ރައްކާތެރިކޮށް ދުޅަހެޔޮ، ކުރިއަރާފައިވާ ގައުމެއް ބިނާކުރުމުގެ އަސާސްގެ މައްޗަށެވެ.

ކުރީގެ ރައީސް ޑރ. މުހައްމަދު ވަހީދު ލިޔުއްވި އެވެ؛ މިފަދަ ސިޔާސީ ހަސަދަތަކުގައި ކުޑަކުދިންގެ އަބުރު ނަގާލައި، ސިޔާސީ މީހުންގެ އާއިލާތަކާ ބެހި ފުރައްސާރަކުރުމަކީ މި ސަގާފަތެކެވެ. މިއީ މި ކަން ހުއްޓުވަން ވީ ވަގުތެކެވެ. ރައީސްގެ ދަރިދަރިކަލުންނަށް ނިސްބަތްކޮށް ކުރާ ފުރައްސާރަ ކުށްވެރިކުރެއްވި އެވެ. 

ފޮނަދޫ ދާއިރާގެ ކުރީގެ މެންބަރު އަދި ގާނޫނީ ވަކީލު މޫސާ ސިރާޖު ވެސް ލިޔުއްވި އެވެ؛ ދަރިކަލުންގެ ކަރާމާތް ގެއްލުވާލި މައްސަލާގައި ދައުވާ އުފުލަން އާއިލާގެ ފަރާތުން ނިންމެވި ނިންމެވިމަކީ ރަނގަޅު ނިންމެވުމެކެވެ. ސިޔާސީ ބޭނުމަށް މައުސޫމް ކުޑަކުދިންގެ ކަރާމާތް ނަގާލައި، އެ ކުދިންނަށް ފުރައްސާރަކުރުމާ އޭނާ ވެސް ދެކޮޅެވެ.

ސިރާޖު ވަނީ މީގެ ކުރިން އެމްޑީޕީގެ ވެރީންގެ އާއިލާއަށް ނިސްބަތްކޮށް ދައްކާފައި ހުރި ވާހަކަ ވެސް ކުށްވެރިކޮށްފަ އެވެ. މި ވަގުތު ދައުވާކުރުމަށް ތާއީދުކުރަނީ އެއްވެސް ބަޔަކު މިފަދަ ކަމެއްގެ ޝިކާރައަކަށް ދެން ވެސް ވާން ބޭނުން ނުވާތީ އެވެ.

މިއަދުގެ ނޫސްވެރިންގެ ބައްދަލުވުމުގައި ރައީސްގެ އާއިލާގެ ފަރާތުން މައުލޫމާތު ދެއްވި ވަކީލު، ކުރީގެ ބަންޑާރަނައިބު އާޒިމާ ޝުކޫރު ވިދާޅުވީ، މި މައްސަލަ ދިރާސާކުރެއްވުމަށް ފަހު މި ހަފްތާގެ ތެރޭގައި ދައުވާ ހުށަހަޅުއްވާނެ ކަމަށެވެ. 

----------

ސަރުކާރާ ވާދަވެރި ވިސްނުމުގެ މީހުން ވެސް މިއަދު ދައްކަނީ މި ވާހަކަ އެވެ. ބައެއް މީހުނަށް މަންދީ ދެއްކި ވާހަކައަށް ވުރެ ގޯހީ މަންދީއަށް ދައުވާ ކުރަން ހިފުމެވެ.

ކުރީގެ ބަންޑާރަ ނައިބު ދިޔާނާ ސައީދު ލިޔުއްވި އެވެ؛ މި މައްސަލައާ ގުޅިގެން ބަޔަކަށް ދައުވާކުރުން އަދި މާ އަވަހެވެ. ކުރަން ޖެހޭ ކަމަކީ ދޮގު މައުލޫމާތެއް ފަތުރާނަމަ އެކަމުގެ ހަގީގަތް ތިލަކުރުމެވެ. އަދި މިހާރު އޮތް ހާލަތުގައި ރާއްޖޭގެ ކޯޓުތައް ވަނިކޮށް، މިފަދަ މައްސަލައެއް ހުށަހެޅުމަކީ ރަނގަޅު ގޮތެއް ވެސް ނޫން ކަމަށެވެ.

-------

ހިޔާލުފާޅުކުރުމުގެ މިނިވަންކަން ވެސް އޮންނަން ވާނީ ވަކި ހުދޫދެއްގެ ތެރޭގަ އެވެ. ނަފްރަތް އުފައްދަން ފަތުރާ ވާހަކަތައް ހުއްޓުވަން ވެސް އެބަ ޖެހެ އެވެ. ސްކޫލެއް ކިޔަވަމުންދާ، މުސްތަގުބަލެއް އޮތް ކުއްޖަކާ ދިމާކޮށްލުން 'ސަޅި'އެއް ނޫނެވެ.