ހާޓް އެޓޭކަކީ ހިތަށް ލޭ ގެންގޮސްދޭ ލޭ ހޮޅީގެ ތެރޭގައި އެތިކޮޅެއް ތާށިވެ، ހިތުގެ ވަކި ހިސާބަކަށް ގެންގޮސްދޭންޖެހޭ ލޭ ނުލިބުމުގެ ސަބަބުން ހިތުގެ ވިންދު ހުއްޓުމެވެ. ނުވަތަ ހިތުގެ ބަޔަކަށް ލޭ ފޯރުކޮށްދިނުމުގައި ހުރަސްތަކާއި ކުރިމަތިވެ، އެ ހިސާބަށް ލޭ ފޯރުކޮށްނުދިނުމުގެ ސަބަބުން އެ ހިސާބުގެ ސެލްތައް މަރުވެ ހަލާކުވުމުންނެވެ.

އާންމުގޮތެއްގައި ހާޓް އެޓޭކް ޖެހެނީ، ހިތަށް ލޭ ފޯރުކޮށްދޭ މައި ލޭހޮޅިއެއްކަމުގައިވާ "ކޮރޯނަރީ އާޓަރީ" ބެދުމުން ނުވަތަ ލޭހޮޅީގެ ފާރުގައި ސަރުބީ އަދި ލޭގެ ހުދު ސެލްގެ ވައްތަރެއްކަމުގައިވާ "މެކްރަޕޭޖް" ޖަމާވެގެން އުފެދިފައިވާ ކޮބަޑިގަނޑު ފަޅައިގެން ދިއުމުންނެވެ. 

ހާޓް އެޓޭކް ޖެހޭ ގޮތްތައް:

• ސާފު ލޭ ދަތުރުކުރާ ލޭހޮޅި ބެދޭގޮތްވުމުން
•  ސާފު ލޭ ދަތުރުކުރާ ލޭހޮޅި ހިމަވުން ނުވަތަ ފިތުން

ހާޓް އެޓޭކް ޖެހެން މެދުވެރިވާ ބައެއް ކަންކަން:

ހާޓް އެޓޭކް ޖެހުމަށް ދެ ބާވަތެއްގެ ކަންކަން މަގުފަހިކުރުވައެވެ. އޭގެ ތެރެއިން އެއް ބާވަތަކީ ތިމާގެ އިހްތިޔާރުގައި ނެތް ކަންކަމެވެ. އޭގެ ތެރޭގައި އުމުރާއި ޖިންސާއި އާއިލީ ގޮތުން ވާރުތަވުން ހިމެނެއެވެ. އަނެއް ބާވަތަކީ، ތިމާގެ އިހްތިޔާރުގައިވާ ކަންކަމުގެ ސަބަބުން ނުވަތަ ދިރިއުޅުމުގެ އާދަކާދަތައް ބަަހައްޓާ ގޮތަކުން ހާޓް އެޓޭކަށް މަގުފަހިވުމެކެވެ. އޭގެ ބައެއް މިސާލަކީ، ދުންފަތުގެ އިސްތިއުމާލު ކުރުމާއި ހަކުރުބައްޔާއި ލޭމައްޗަށް ދިއުމާއި ކޮލެސްޓްރޯލް މައްޗަށް ދިއުމާއި ހެލިފެލިވެ އުޅުމާއި ކަސްރަތުކުރުން މަދުވުމާއި މަސްތުވާތަކެއްޗާއި ބަނގުރާ ބޭނުންކުރުން ފަދަ ކަންކަން ހިމެނެއެވެ.

ހާޓް އެޓޭކެއް ޖެހުމުން ފެންނާނެ ބައެއް ކަންކަން:

• މޭގައި ރިހުން (މޭމައްޗަށް ބާރުވެފައި ނުވަތަ މޭފުރިފައިވާކަމުގެ އިހްސާސްކުރެވުން)
• މޫނުމައްޗަށް އަދިރިވުން
• ވަރުބަލިވެ، ވަރުދެރަވުން
• އާދަޔާ ހިލާފަށް ދާހިއްލުން
• ނޭވާކުރުވުން ނުވަތަ ނުލެވުން
• ހިތުގެ ވިންދު އަވަސްވުން
• ތުންފަތް ހިކުން
• އަނބުރައިގަތުން ނުވަތަ ހޭނެތުން