ޑައުން ސިންޑްރަމް އަކީ އުފެދުމުގައި ހުންނަ އުނިކަމެކެވެ. މިއީ އުފަންވާއިރު ހުންނަ އައިބެކެވެ. ނުވަތަ ބައްޔެކެވެ. މި ބައްޔަށް ޓްރައިސޯމީ 21 އޭ ވެސް ކިޔައި އުޅެއެވެ. ޑައުން ސިންޑްރަމް ނުވަތަ އުފެދުމުގައި ހުންނަ އުނިކަމަށް ޓްރައިސޯމީ 21 ކިޔަނީ 21 ވަނަ ޖޯޑުގައި ދެ ކްރޮމޯސޯމްގެ ބަދަލުގައި ތިން ކްރޮމޮސޯމް ހުންނާތީއެވެ. މިގޮތަށް ކްރޮމޮސޯމްގައި ހުންނަ އައިބެއްގެ ސަބަބުން އުނގެނުމުގައި ނުކުޅެދުންތެރިކަން ކުދިންނަށް މެދުވެރިވާ އެންމެ އާންމު ސަބަބެއްކަމަށް ބެލެވިފައިވަނީ ޑައުން ސިންޑްރޯމެވެ.

އިންސާނާގެ ހަށިގަނޑުގެ ސެލްތަކުގައި އާންމުކޮށް ދެ ކްރޮމޮސޯމް ހުންނައިރު ކޮންމެ ޖޯޑެއްގައި 23 ކްރޮމޮސޯމް ހުރެއެވެ. އެއީ މަންމަ އާއި ބައްޕަގެ ފަރާތުން ލިބޭ ކޮރޮމޮސޯމެވެ. މިގޮތުން ދެ މީހުންގެ ފަރާތުން ލިބޭ އެއްޖޯޑުގެ ކްރޮމޮސޯމް އެއްކޮށްލައިގެން 46 ޖޯޑު ކްރޮމޮސޯމް ކޮންމެ ކުއްޖެއް ގައިގައިވެސް ހުރެއެވެ. ނަމަވެސް ޑައުން ސިންޑްރަމް ބަލި ހުންނަ ކުއްޖަކަށް މިއަދަދު އިތުރުވެއެވެ. އިތުރު ތިން ވަނަ ކްރޮމޮސޯމެއް ކުއްޖާގެ ގައިގައި ހުރުމުން ޖުމްލަ 47 ކޮރޮމޮސޯމް އެ ފަދަ ކުއްޖެއްގެ ގައިގައި ހުންނާނެއެވެ.

ޑައުން ސިންޑްރަމްގެ ވައްތަރުތައް: 

ޑައުން ސިންޑްރަމްގައި ހުންނަނީ ތިން ވައްތަރެކެވެ. އެއީ:

1- ޓްރައިސޯމީ 21: ޑައުން ސިންޑްރަމް ބަލި ޖެހިފައިވާ ކުދިންގެ ތެރެއިން 95 އިންސައްތަ ކުދިންނަކީ މި ވައްތަރުގެ ޑައުން ސިންޑްރަމް ބަލި ޖެހިފައިވާ ކުދިންނެވެ. 

2- މެޒޯއިކް ޑައުން ސިންޑްރަމް: މި ވައްތަރުގެ ޑައުން ސިންޑްރަމް ބަލި ޖެހިފައިވާ ކުދިން ފެންނަނީ ވަރަށް މަދުންނެވެ. 

3- ޓްރާންސް ލޮކޭޝަން ޑައުން ސިންޑްރަމް: މި ވައްތަރުގެ ޑައުން ސިންޑްރަމްވެސް ފެންނަނީ ވަރަށް މަދުންނެވެ. 

ބަލި ޖެހުމަށް މެދުވެރިވާ ކަންތައްތައް:

1- މައިމީހާގެ އުމުރު މަތިވުން:

ބަލިވެ އިންނައިރު މައިމީހާގެ އުމުރު މަތިވުމަކީ ޑައުން ސިންޑްރަމް ހުންނަ ކުދިން ލިބުމުގެ ފުރުސަތު އިތުރުކޮށްދޭ ކަމެކެވެ. އުމުރުން 35 އަހަރުން މަތިވުމަށްފަހު ބަލިވެއިންނަ އަންހެނުންނަށް ލިބޭ ކުދިންގެ ތެރެއިން ކޮންމެ 350 ކުދިންގެ ތެރެއިން އެއް ކުއްޖަކަށް ޑައުން ސިންޑްރަމް ބަލި ކުރިމަތިވުމުގެ ފުރުސަތު ބޮޑެވެ. އަދި އުމުރުން 40 އަހަރު ވުމަށްފަހު ބަލިވެއިންނަ އަންހެނުންނަށް ލިބޭ ކުދިންގެ ތެރެއިން ކޮންމެ 100 ކުދިންނުން އެއް ކުއްޖަކަށް ޑައުން ސިންޑްރަމް ބަލި ކުރިމަތިވުމުގެ ފުރުސަތު ބޮޑެވެ. އަދި 45 އަހަރުން މަތީގެ އަންހެނުން ބަލިވެ އިނުމަށްފަހު ލިބޭ ކުދިންގެ ތެރެއިން ކޮންމެ 30 ކުދިންގެ ތެރެއިން އެއް ކުއްޖަކަށް ޑައުން ސިންޑްރަމް ބަލި ޖެހުމުގެ ފުރުސަތު ބޮޑެވެ. 

2- ކުރިން ޑައުން ސިންޑްރަމް ބަލި ޖެހިފައި ހުންނަ ކުއްޖަކު ލިބިފައިހުރުން:

ކުރިން ޑައުން ސިންޑްރަމް ބަލި ޖެހިފައި ހުންނަ ކުއްޖެއް ލިބިފައި ހުންނަ އަންހެނުންނަށް ދެވަނަ ފަހަރަށް މި ބަލީގެ ކުއްޖެއް ލިބުމުގެ ފުރުސަތު ބޮޑެވެ. 

3- ދެމަފިރިންނަކީ ޓްރާންސްލޮކޭޝަން ޑައުން ސިންޑްރަމް ހުންނަ ކެރިއަރުންނަށްވުން:

މިއީ ރާއްޖޭގައި ޑައުން ސިންޑްރަމް ބަލި ޖެހިފައިވާ ކުދިން ލިބުމަށް މެދުވެރިވެފައިވާ ސަބަބުތަކުގެ ތެރެއިން އެންމެ އާންމު އެއް ސަބަބެވެ. މަންމަ އާއި ބައްޕަގެ ފުށުންވެސް ދަރިންނަށް ބައްޔާއި ގުޅުންހުރި ބަހާތައް ވާރުތަވެދާނެއެވެ.

ވިހެއުމުގެ ކުރިން ކުއްޖާ ގައިގައި ޑައުން ސިންޑްރޯމް ހުރިތޯ ދެނެގަންނާނީ ކިހިނެއް؟

ބަނޑުގައިވާ ދަރިފުޅު ގައިގައި ޑައުން ސިންޑްރަމް ބަލި ހުރިތޯ ބެލުމަށް މާބަނޑު ދުވަސްވަރު ޓެސްޓުތަކެއް ކުރެވިދާނެއެވެ. އެގޮތުން މާބަނޑު ދުވަސްވަރު ބަނޑުގައިވާ ދަރިފުޅު ގައިގައި ޑައުންސިންޑްރަމް ހުރިތޯ ބެލުމަށް ސްކްރީން ޓެސްޓް އަދި ޑައިގްނޯސްޓިކް ޓެސްޓް ހެދުމަށްފަހު ކުއްޖާގެ ގައިގައި ބަލި ހުރިތޯ ދެނެގަނެވިދާނެއެވެ. 

ޑައުން ސިންޑްރަމް ބަލި ވިހެއުމުގެ ކުރިން ކުއްޖާގެ ގައިގައި ހުރިތޯ ބެލުމަށް އާންމުކޮށް ކޮށް އުޅޭ ތިން ޓެސްޓް:

1- ސްކޭންކުރުން

2- އިންޓެގްރޭޓެޑް ސްކްރީނިންގް ޓެސްޓް 

3- ސެލްފްރީ ފީޓަލް ޑީއެންއޭ އެނަލިސިސް 

ހެދިބޮޑުވުމުގައި ޑައުން ސިންޑްރަމް ޖެހިފައިވާ ކުދިންނަށް ދިމާވާނެ ތަފާތު ކަންތައްތައް:

1- އިށީނުން: އުފެދުމުގައި ރަނގަޅު ކުއްޖަކާއި އަޅާބަލާއިރު ރަނގަޅު ކުއްޖަކު ފަސް މަހާ ނުވަ މަހާއި ދޭތެރޭގައި އިށީންނުމުގެ މަރުހަލާ ފެށޭއިރު ޑައުން ސިންޑްރަމް ބަލި ހުންނަ ކުއްޖަކު އިށީންނުމުގެ މަރުހަލާ ފެށޭނީ ހަ މަހާ 30 މަހާ ދޭތެރޭއެވެ. 

2- ފިރުކުން: އުފެދުމުގައި ރަނގަޅު ކުއްޖަކު ހަ މަހާއި 12 މަހާއި ދޭތެރޭގެ މުއްދަތެއްގައި ފިރުކުމުގެ މަރުހަލާ ފެށޭއިރުު ޑައުން ސިންޑްރަމް ބަލި ހުންނަ ކުއްޖަކު ފިރުކުމުގެ މަރުހަލާ ފެށޭނީ އަށް މަހާއި 22 މަހާއި ދޭތެރޭގައެވެ. 

3- ކޮޅަށް ތެދުވުން: އުފެދުމުގައި ރަނގަޅު ކުއްޖަކު އަށް މަހާއި 17 މަހާއި ދޭތެރޭގެ މުއްދަތެއްގައި ކޮޅަށް ތެދުވުމުގެ މަރުހަލާ ފެށޭއިރު ޑައުން ސިންޑްރަމް ބަލި ޖެހިފައިވާ ކުއްޖަކު ކޮޅަށް ތެދުވުމުގެ މަރުހަލާ ފެށޭއިރު އެއް އަހަރާއި ތިން އަހަރާބައިގެ މުއްދަތެއް ތެރޭގައެވެ. 

4- ހިނގުން: އުފެދުމުގައި ރަނގަޅު ކުއްޖަކު ނުވަ މަހާއި 18 މަހާ ދޭތެރޭގެ މުއްދަތެއްގައި ހިނގައިގަންނައިރު ޑައުން ސިންޑްރަމް ބަލި ހުންނަ ކުއްޖަކު ހިނގައިގަންނަން ފަށަނީ އެއް އަހަރާއި ހަތަރު އަހަރާ ދޭތެރޭގައެވެ.

5- ފުރަތަމަ ބަސްބުނުން: އުފެދުމުގައި ރަނގަޅު ކުއްޖަކު އެއް އަހަރާއި ތިން އަހާރާ ދޭތެރޭގެ މުއްދަތެއްގައި ވާހަކަ ދައްކާއިރު ޑައުން ސިންޑްރަމް ބަލި ހުންނަ ކުއްޖަކަށް ވާހަކަދެއްކެނީ އެއް އަހަރާއި ހަތަރު އަހަރާއި ދޭތެރޭގައެވެ. 

މީގެ އިތުރުންވެސް އުފެދުމުގައި ރަނގަޅު ކުއްޖަކާ އަޅާބަލާއިރު ޑައުން ސިންޑްރަމް ބަލި ހުންނަ ކުއްޖަކާ ތަފާތުވާ އެހެން އިތުރު ކަންތައްތަކެއްވެސް ހުރެއެވެ. މީގެ ތެރޭގައި އަމިއްލައަށް ކަންކަން ކުރުމުގައި އާދައިގެ ކުއްޖަކާ އަޅާ ބަލާއިރު ޑައުން ސިންޑްރަމް ބަލީގެ ކުދިންނަށް މިކަންކަން ކުރެވުމުގެ މަރުހަލާ ފެށެނީ ލަހުންނެވެ. މިގޮތަށް ފާހަގަކުރެވޭ ކަންތައްތަކުގެ ތެރޭގައި ހިނިތުންވުން، އިގިލިން ނަގައިގެން ތަކެތި ކައިހެދުން، މީހެއްގެ އެހީއާއި ނުލާ ތަށިން ފެންބުއިން، ސަމުސަލުން އަމިއްލައަށް ކައިހެދުން، ބޮޑުކަމުދިއުން ކޮންޓްރޯލްކުރުން އަދި މީހެއްގެ އެހީ އާއިނުލާ އަންނައުނު ލައިހެދުން ފަދަ ކަންތައްތައް ހިމެނެއެވެ. 

ޑައުން ސިންޑްރަމް ކުދިންގެ ގައިން އާންމުކޮށް ފެންނަ ބަލިތައް:

1- އުފަންވާއިރު ހުންނަ ހިތުގެ މައްސަލަތައް: ޑައުން ސިންޑްރަމް ހުންނަ ކުދިންގެ ތެރެއިން ދެބައިކުޅަ އެއްބައި ކުދިންގެ ގައިން މި ބަލި ފެނިފައި އެބަހުއްޓެވެ.

2- ލޭގެ ކެންސަރުޖެހުން: ޑައުން ސިންދްރަމް ބަލި ޖެހިފައި ހުންނަ ކުދިންނަށް މި ބަލި ޖެހުމުގެ ފުރުސަތު ބޮޑެވެ.

3- ގައިން ގަޔަށް އަރާ ބަލިތައް: ޑައުން ސިންޑްރަމް ބަލި ޖެހިފައި ހުންނަ ކުދިންގެ ދިފާއީ ނިޒާމް ބަލިކަށިވުމުގެ ސަބަބުން ގައިން ގަޔަށް އަރާ ބަލިތައް ޖެހުމުގެ ފުރުސަތު ބޮޑެވެ.

5- ހަނދާންނެތުން: ޑައުން ސިންޑްރަމް ހުންނަ ކުއްޖަކަށް ހަނދާންނެތުމުގެެ ބަލި ރަނގަޅު ކުއްޖަކަށްވުރެ އިތުރުކަން ފާހަގަކުރެވެއެވެ.

6- ނިދީގައި ގުގުރިދެމުން: ޑައުން ސިންޑްރަމް ބަލި ހުންނަ ކުއްޖަކު ނިދީގައި ގުގުރި ދެމުމުގެ ފުރުސަތު ބޮޑެވެ. 

7- މާބޮޑަށް ފަލަވުން: ދައުން ސިންޑްރަމް ހުންނަ ކުއްޖަކު މާބޮޑަށް ފަލަވުމުގެ މައްސަލަ ރަނގަޅު ކުއްޖަކާ އަޅާ ބަލާއިރު ފިރުސަތު ބޮޑެވެ.

މީގެ އިތުރުންވެސް ޑައުން ސިންޑްރަމް ހުންނަ ކުދިންނަށް ދިމާވާ އެހެނިހެން ސިއްހީ މައްސަލަތައް ރަނގަޅު ކުއްޖަކާ އަޅާ ބަލާއިރު ގިނަ ކަމަށް ފާހަގަ ކުރެވެއެވެ.