ރައީސް ޑރ. މުހައްމަދު މުއިއްޒުގެ ދޮށީ ފިރިހެން ދަރިކަލުން އުމެއިރު މުހައްމަދަކީ ދުންފަތުގެ އިސްތިއުމާލު ކުރާ ކުއްޖެއް ނޫން ކަމަށާއި އޭނާ ވޭޕް ނުކުރާ ކަމަށް ފަސްޓް ލޭޑީ ސާޖިދާ މުހައްމަދު ވިދާޅުވެއްޖެ އެވެ.

ފަސްޓް ލޭޑީ މިފަދައިން ވިދާޅުވީ، ރާއްޖޭގައި ވޭޕް މަނާކުރީ އުމައިރު ވޭޕް ބޭނުންކުރާތީ ކަމަށް އިދިކޮޅު އެމްޑީޕީގެ އެއްވުންތަކުގައި އެ ޕާޓީގެ ބައެއް އެކްޓިވިސްޓުން ތުހުމަތުކޮށް ވާހަކަ ދެއްކުމާ ގުޅިގެން މިއަދު ނެރުއްްވި ބަޔާނެއްގެވެ.

އެ ނޫސްބަޔާނުގައި ފަސްޓް ލޭޑީ ވިދާޅުވީ، އެ ކަމަނާގެ ދަރިކަލުން އުމައިރު މުހަންމަދު މުއިއްޒުއަށް ނިސްބަތްކޮށް، މިވޭތުވެދިޔަ އަހަރެއްހާ ދުވަހުގެތެރޭގައި، ހާއްސަކޮށް މިދިޔަ ދެތިން ދުވަހެއްގެ ތެރޭގައި ހަގީގަތެއް ނެތް ދޮގު ވާހަކަތައް ދައްކައި، މީޑިއާއާއި ސޯޝަލް މީޑިއާގެ އެކި ޕްލެޓްފޯމްތައް މެދުވެރިކޮށް ފަތުރާފައިވާ ކަމަށެވެ. އެގޮތުން ފަތުރާފައިވާ ވާހަކަތަކުގެ ތެރޭގައި އުމައިރަކީ ވޭޕް ބޭނުންކުރާ ކުއްޖެއް ކަމުގައިވާ ފަތުރާ ވާހަކަތަކަކީ ދޮގު ވާހަކަތަކެއް ކަމަށް ވިދާޅުވިއެވެ. 

"މި ފުރުސަތުގައި އުމައިރަކީ ވޭޕް ނުވަތަ ދުންފަތުގެ އިސްތިއުމާލުވެސް އެއްވެސް ގޮތަކަށް ކުރާ ނޫނީ ކޮށްފައިވާ ކުއްޖެއްނޫންކަމުގައި، ތިޔަ އެންމެ ބޭފުޅުންގެ މައުލޫމާތަށްޓަކައި ވަރަށް ސާބިތުކަމާއެކު ދަންނަވަމެވެ. މިކަންކަން މިހެންކުރަމުންދަނީ އަޅުގަނޑުގެ ފިރިމީހާއާއި ސިޔާސީ ގޮތުން ހިޔާލުތަފާތު އެކި ފަރާތްތަކުން ކަމުގައި ފާހަގަކުރަމެވެ." ފަސްޓް ލޭޑީ ވިދާޅުވިއެވެ.

އެ ބަޔާނުގައި ފަސްޓް ލޭޑީ ވިދާޅުވީ، އެ ކަންތައްތަކުގެ ސަބަބުން އުމައިރުގެ މުސްތަގުބަލަށް ނޭދެވޭ އަސަރުތަކެއްކޮށް، އޭނާގެ ރައްކާތެރިކަން ކަށަވަރުނުވާވަރުގެ ކަންތައްތަކަށް މަގުފަހިވެދާނެ ފަދަ ފުރުސަތުތައް ހުޅުވިގެން ގޮސްފައިވާތީ ކަންބޮޑުވެވަޑައިގަންނަވާ ކަމަށެވެ.

ރައީސް މުއިއްޒުގެ އާއިލާގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި، އެ އާއިލާގެ ގާނޫނީ ވަކީލު، އާޒިމާ ޝަކޫރު ވިދާޅުވީ ރައީސްގެ ބޭފުޅުންނާ ގުޅޭ ގޮތުން ދެއްކި ވާހަކަތަކަކީ ޖިނާއީ ދައުވާ އުފުލޭ ވަރުގެ ވާހަކަތަކެއް ކަމަށާއި އެހެންކަމުން އެމްޑީޕީއަށާއި އެ ޕާޓީގެ ޗެއާޕާސަން ފައްޔާޒް އިސްމާއިލްގެ އިތުރުން މަރިޔަމް ޒުބެއިރު (މަންދީ) އަށް ދައުވާކުރަން ނިންމާފައިވާ ކަމަށެވެ.