މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ޑެޕިއުޓީ ގަވަރުނަރުކަމުން އަހުމަދު އިމާދު އިސްތިއުފާ ދެއްވައިފިއެވެ. 

ޑެޕއިުޓީ ގަވަރުނަރުކަމުން އިމާދު އިސްތިއުފާ ދެއްވާފައި މިވަނީ ޒިންމާ އަދާކުރަން ފަސްޖެހިފައިވާ ކަމަށް ތުހުމަތުކޮށް، އޭނާ ވަކިކުރަން ރައްޔިތުންގެ މަޖިލީހަށް ހުށަހަޅާފައިވަނިކޮށެވެ. 

އެމްއެމްއޭގެ ގަވަރުނަރުކަމުން މިއަދު އިސްތިއުފާ ދެއްވުމަށްފަހު ނެރުނު ބަޔާނުގައި އިމާދު ވިދާޅުވީ، އެމްއެމްއޭއިން އިސްތިއުފާ ދެއްވީ، މި ފަހުން އެމްއެމްއޭއިން ނިންމާފައިވާ ނިންމުންތަކަކީ އޭނާގެ ނަޒަރުގައި، މުއައްސަސާގެ އަސާސީ މަގުސަދުތަކާ އެއްގޮތްވާ ގޮތުގެމަތިން ނިންމާފައިވާ ނިންމުންތަކެއް ކަމުގައި ނުވާތީ ކަމަށެވެ.

ހުޅުމާލެއިން 22 ހެކްޓަރުގެ ބިން 14 ބިލިއަން ރުފިޔާ އަށް ގަނެ، އެޗްޑީސީ މެދުވެރިކޮށް އެ ފައިސާ ސަރުކާރުގެ ހަރަދުތަކަށް ދޫކުރަން އެމްއެމްއޭގެ ބޯޑުން ވަނީ ނިންމައިފައެވެ. 

އެ ނިންމުމާ އެއިރުވެސް ދެކޮޅު ހެއްދެވި އިމާދު ވިދާޅުވީ، އެކްސްޗޭންޖް ރޭޓްގެ ޕެގް ހިފެހެއްޓުމަށްޓަކައި ހިފެހެއްޓިފައިވާ (ޓައިޓް މަނިޓަރީ) ފައިސާގެ ސިޔާސަތުތައް ގެންގުޅެން ލާޒިމުވެފައިވާ ކަމަށާއި ފައިސާ އިތުރަށް ޗާޕުކުރުމާ ދުރުހެލިވުމަށާއި ދިގު ރާސްތާގެ އިގްތިސޯދީ ހަމަޖެހުން ގެނައުމަށްޓަކައި ސަރުކާރުގެ ހަރަދުތައް ކުޑަ ކުރުން މުހިންމު ކަމަށެވެ.

"ވީމާ، މިހާރުގެ އިގްތިސޯދީ ހާލަތަށް ބަލާއިރު، އިތުރަށް ފައިސާ ޗާޕުކުރުމުން، ސީރިއަސް މެކްރޯ އިކޮނޮމިކް އަސަރުތަކެއް މެދުވެރިވާނެއެވެ. އިތުރަށް ފައިސާ ޗާޕުކުރުމަކީ މިހާރުވެސް ބޭންކިން ނިޒާމުގައި ހުރި އެކްސެސް ލިކުއިޑިޓީ ބޮޑުތަނުން އިތުރުވެގެންދާނެ ކަމެކެވެ" އިމާދު ވިދާޅުވިއެވެ. 

އިމާދު ވިދާޅުވީ އޭނާ ސަރުކާރުގެ ކިބައިން އެދެނީ ފިސްކަލް ޒިންމާދާރުކަމަށް އިސްކަންދީ، އެމްއެމްއޭގެ މިނިވަންކަން ހިމާޔަތްކޮށް އަދި މެކްރޯއިކޮނޮމިކް ހަރުދަނާކަން ޔަގީންކުރުމަށް ބޭނުންވާ ފިޔަވަޅުތައް އެޅުމަށް ކަމަށެވެ.