ރާއްޖެއިން ޑެންމާކަށް ކަނޑައަޅުއްވާ ނޮން ރެއިޑަންޓް ސަފީރުކަމުގެ މަގާމަށް އައްޔަން ކުރެއްވުމަށް ރައީސް ފޮނުއްވި ގީލާ އަލީގެ ނަން ފާސްވެ މަޖިލީހުން ރުހުން ދީފިއެވެ. 

ޤީލާ އަލީގެ ނަން ފާސްވެފައިވަނީ މިއަދުގެ ޖަލްސާގެ ވޯޓުގައި ބައިވެރިވި މެންބަރުންގެ އަގުލަބިއްޔަތުންނެވެ. ރާއްޖޭގެ ފޮރިން ސާވިސް ގާނޫނުގައި ވާ ގޮތުން ރާއްޖޭގެ ރައީސްކަމަށް ހުންނަވާ ބޭފުޅަކަށް ރާއްޖެއިން ބޭރުގެ ގައުމުތަކަށް ސަފީރުން ކަނޑައެޅުއްވޭނީ މަޖިލީހުން ފާސްކުރުމަށްފަހުއެވެ. 

މިގޮތުން އެއް ދުވަސްކުރިން މަޖިލީހުގެ ޖަލްސާއަށް ގިލާ އަލީގެ ނަން ހުށަހަޅުއްވާ ރައީސް ވަނީ މަޖިލީހުގެ ތަޅުމަށް ސިޓިއެއް ފޮނުއްވާފައެވެ. އެ ސިޓީގައި ޤިލާ އަލީ އައްޔަންކުރެއްވުމާމެދު މަޖިލީހުން ގޮތެއް ނިންމައިދެއްވުމަށް އެދި ރައީސް އެދިލައްވާފައިވެއެވެ.

ރާއްޖެއިން ޑެންމާކަށް ކަނޑައަޅުއްވާ ނޮން ރެސިޑަންޓް ސަފީރުކަމަށް ޤީލާ އަލީ އައްޔަން ކުރެއްވުމަށް މަޖިލީހުން ފާސްކުރެއްވީ ޚާރިޖީ ގުޅުންތަކުގެ ކޮމިޓީން އެ މައްސަލަ ދިރާސާ ކުރުމަށް ފަހުގައެވެ. އެ މައްސަލަ ދިރާސާކޮށް ނިންމެވި ގޮތުގެ މަށްޗަށް ޚާރިޖީ ގުޅުންތަކުގެ ކޮމިޓީގެ މުގައްރިރުން ބަހުސްކުރެއްވުމަށްފަހު ޤީލާ އަލީގެ ނަން ފާސްކޮށްފައިވެއެވެ. 

ޚާރިޖީ ކޮމެޓީގެ މުގައްރިރުން ކުރެއްވި ބަހުސްގައި ވިދާޅުވެފައިވަނީ، ނޮން ރެސިޑެންޓް ސަފީރުން ގޮތުގައި މަޖިލީހުން މި ފަހުން ރުހުންދީފައިވާ ބޭފުޅުންނަކީ ދާއިމީ މަންދޫބުން ކަމަށާއި ކުރިންވެސް އެކި ގައުމުތަކަށް ކަނޑައަޅުއްވާފައިތިބި މަންދުބުންކަން ފާހަގަކުރެއްވިއެވެ. 

މިގޮތުން ރާއްޖެއިން ޑެންމާކަށް އައްޔަންކުރައްވަން މަޖިލީހުން ފާސްކުރެއްވި ނޮން ރެސިޑެންޓް ސަފީރު ޤީލާ އަލީ އަކީ މި ވަގުތު ރާއްޖެއިން ބެލްޖިއަމަށާ ޔޫރަޕިއަން ޔޫނިއަނަށް ކަނޑައަލުއްވާފައި ހުންނަވާ ސަފީރުކަން ފާހަގަކުރެއްވިއެވެ.